بيتكون عندك قشطه كتير و مش عارفه تعملي بيها ايه؟
اول حاجه خللي عندك علبه في الفريزر تجمعي فيها القشطه كل ما تتكون عندك في البيت و ما تبتديش تعملي السمن الا لما يتكون عندك كميه كويسه لان السمن الناتج بيكون يمكن ربع كميه القشطه فاحسبيها.. خللي عندك علبه كبيره و لما تكمل ابتدي اعملي السمن البلدي.
طلعي القشطه و سيبيها تفك من التجميد.
حطيها في حله على النار و عليها رشه ملح و خليكي قدامها لغايه ما تحسيها زي الكريمه السايبه.
و طي عليها النار و كل 5 دقايق قلبيها علشان بيقصل منها كتل بتترسب في قعر الحله فا خللي بالك علشان ما تتحرقش.
حتقعد حوالي ساعه حتحسيها تقلت و بتطلع فقاقيع زي اللي في الصوره.
اطفي النار و صفيها في حله تانيه.
و حطيها تاني على النار ووطي النار مش حتاخد 10 دقايق و كل الميه اللي فيها حتتبخر و حيفضل في شويك كتل على الوش اطفي النار و سيبيها حتلاقي الوش اللي كان فوق اترسب.
صفيها تاني في علبتها و سيبيها تبرد.
بالتسبه للمواد اللي صفينا منها السمنه دي بيسموها مورته في ناس بتحب تاكلها و انا باعمل بيها برام الرز ساعات بادهن بيها القعر للبرام و الجوانب .. ممكن تنقليها على النار تاني 10 دقايق علشان تاخد لون حلو و لو في بواقي سمنه ممكن تطلع ( بس حيكونو معلقه او اتنين بالكتير ) تخدي المعلقتين سمنه دول في العلبه و المورته انقليها في علبه تانيه في التلاجه . و بس
على فكره الطريقه سهله اعمليها و انتى واقفه بتطبخى في المطبخ فا حتكون عينك عليها و كمان بنستفيد من القشطه اللي ممكن بتزيد عن حاجه ناس كتير و كمان بنعمل سمنه بلدي و دي غاليه و مش حتكون نضيفه زي مااحنا عاملينها على الاقل بتاعتنا سمن بلدي صافي دي طريقتي و الصور دي انا صورتهالكم للشرح و ان شاء الله تعجبكم الطريقة.
ليست هناك تعليقات:
إرسال تعليق